Giunay og rape sa bayaw

Babaye giunay sa bayaw dihang giilad kini nga mamalit og pulutan uban sa kapuyo sa iyang maguwang gilugos kini diha sa hilit nga dapit sa Sitio Concepcion Barangay Panugwayan, lungsod sa Medellin niadtong Huwebes sa gabii.

Ang nalugusan giilang si Charlotte (apelyedo gipugngan) 18, dalaga ug lumolupyo sa Barangay Daan Lungsod sa naasoyng lugar kinsa nakig-uban sa iyang amahan ug mga igsuong lalaki nga nakig-inom sa suspek nga si Carlos Diaz, 30 molupyo sa maong lugar.

Sigun pa sa imbestigasyon sa kapolisan ang biktima gipakuyog sa suspek luwan sa motorsiklo niini aron unta sa pagpalit og pulutan apan sa dihang naabot sila sa hilit nga lugar gihunong sa suspek ang motorsiklo ug pugsanon siyang gilugos niini bisan sa iyang pagsupak.

Human sa insidente gitug-an niya ang gihimo kaniya sa suspek hinungdan sa pagkasikop niini ug gipasakaan og kasong pagpanglugos sa korte.