Bata nakuhaa'g shabu

Nasakmitan og shabu sa checkpoint sa kapolisan ang usa ka minor de edad nga lalaki kinsa gidetinir karon sa kapolisan alang sa tukmang lakang nga pagahimoon batok niini.

Ang pagsakmit natigayon ala 1 pasado ang takna sa miaging kaadlawon didto sa Pit-os sa dakbayan sa Sugbo.

Nadakpan sa kapolisan nga mao si Vicente (bansagon gipugngan) nga nagpuyo sa nahisgotang lugar.

Ang nasakmit gikan sa maong minor de edad nga lalaki ang unom ka pakete sa shabu dihang ilang girikisa ang kalawasan.

Sa nasayran gikan sa Talamban Police Station nga ilang gihimo ang checkpoint sa nahisgotang lugar. Milabay ang maong minor de edad nga lalaki sa checkpoint nga gipasiugdahan sa kapolisan sa Talamban Police Station.

Dihang gisitar ang maong batan-on sa nag-checkpoint nga mga polis daw namatikdan nga gikuyawan nga maoy nakaaghat sa ilang pagrikisa sa kalawasan.

Ang mga ebidensiya nga nasakmit sa kapolisan gikan sa maong gikatahapan maoy makapalig-on sa kaso nga kalapasan sa Akta Republic Act 9165 kun gitawag og Comprehensive Dangerous Drug Act of 2002.