Vendors sa Unit 1 pabilin

Dili mahinayon ang pagpapahawa sa dul-an sa 500 ka mga vendors sa Unit-1 Carbon Market bisan pa man og kasugdan na ang rehabilitation sa maong merkado publiko ning umaabot nga mga adlaw.

Kini human gikasabotan atol sa milabay'ng tigum nga gipatawag ni acting Mayor Michael Rama kagahapon nga pangitaan na lang og paagi nga makapadayon sa ilang pagpaninda sa maong lugar ang maong mga vendors samtang ipahigayon ang rehabilitasiyon sa maong merkado.

Kini gumikan sa pagmagahi usab sa 417 ka mga vendors nga kasamtangang naninda sa Unit-3 Carbon Market gumikan kay tuyoon kaayo ang maong lugar ug minus lang ang mga kustomer.

Hinoon gisugyot sa maong mga vendors nga adto na lang sila maninda sa atubangang bahin sa Carbon Police Station samtang giayo pa ang Unit-1.

Ang gipadayag ni acting Market Administrator Elpidio dela Victoria Jr. nga gamay lang kaayo ang maong lugar ug dili na ma-insakto sa pagpahiluna ang tanang mga vendors.

Tungod niini, gibutyag ni dela Victoria nga napangitaan gyud nila og paagi ang pagsulbad sa maong problema sulod sa halos usa ka oras nila nga meeting sa City Hall.

Kini mao ang pagpapirma og waiver sa mga manindahay diha sa Unit-1 aron magpadayong sa pagpaninda sa maong lugar bisan og magsugod na ang rehabilitasiyon sa maong merkado.

Matud ni dela Victoria nga dili nila tugotang makapadayon sa pagpaninda ang maong mga vendors kun dili kini mopirma og waiver nga nagpasabot nga walay tulobagon ang siyudad kun dunay mga kakulian o dautang mahitabo kanila sa pagpaninda sa maong dapit.

Matud ni dela Victoria nga lain nilang gikasabutan mao ang pagtahas sa City Treasurer's Office aron maoy mopakatap kun mopublikar sa mga lokal nga pamantalaan dinhi sa Sugbo nga magpahibalo sa publiko nga mag-amping sa pagpamalit diha sa Unit-1 tungod sa nagpadayong konstruksiyon niini og peligro kun dunay mga panghitabo.