Giduslak sa buang, 2 barangay treasurers nabiktima

Mga sugyot kaniadto pang angayang hipuson kining mga dunay mga deperensya sa pangisip nga naglibod-suroy sa kadalanan,kagahapon duha ka mga barangay treasurers gikan sa kapitolyo nangalandig sa tambalanan human giduslak ug gihapsan sa usa ka "buang" sa walay igong hinungdan.

Si SPO2 Zenaido Pastorfide sa Homicide Section mitug-an sa Banat News nga ang mga milandig sa tambalanan giilang sila si Maria Compacion,40, minyo, tresurera sa Barangay Cantuod ug Neonite Niervas,45, minyo, tresurera usab sa Barangay Aliwanay, lungsod sa Balamban.

Matud pa ni Pastorfide ang mga biktima gikan pa mikuha sa tseke diha sa Kapitolyo ug padulong unta magpa- in cash sa tseke diha sa bangko dihang nahitabo ang pagpangatake sa suspek nga nagpailang si Danilo Cañete walay gitumbok nga pinuy-anan.

Ang duha kauban sa laing tresurera sa barangay Arpili nga si Milagros Ypon dihang kalit nga giduol sa naghukas og sininang "buang" dayon walay daghang istorya giduslak sa buko-buko si Niervas sa gibitbit niining "bara de kabra."

Dihang milingi si Niervas giusban kini og duslak diha sa iyang baba hinungdan sa pagkagisi niini samtang si Compacion mao na usab ang gibukbok sa suspek og bara makadaghang higayon hinungdan usab sa pagkagisi sa buko-buko ug mga bukton niini.

Nianang tungora nagkaguliyang ang mga tawo sa palibot ug gidali og dala ang duruha sa Chong Hua Hospital gumikan sa kadaghan sa ilang mga bun-og nga nahiaguman samtang gitabangan og dakop sa mga tawo ang suspek ug gidala sa Fuente Osmeña police station.