Mga King mikuwestiyon sa resolusyon sa DOJ

Gisupak sa mga abogado sa pamilyang King nga ang National Bureau of Investigation (NBI-7) maoy pa-imbestigahon sa wiretapping sa panag-estorya sa duha ka tawo kabahin sa binayranay og P200 mil aron i-settle ang kasong pagpangdagit batok ni Roderick Go.

Si Atty. Delito Alvarez nagkanayon nga ang NBI ubos sa pagdumala sa Department of Justice. Matud niya nga nagduda sila nga nalambigit si Justice Secretary Raul Gonzalez sa pagmaniobra sa kaso.

Si Gonzalez mipirma pag-aprobar sa resolusyon nga giisyu ni Atty. Napoleon Dilag nga nag-dismiss sa kaso batok ni Go, sa iyang asawa, sa drayber niini ug police escort.

Ang mga Go maoy akusado sa pagdagit ug pagsulay og patay kang James King tungod lamang sa utang nga P20 milyones.

Nagduda ang abogado nga kun ang NBI maoy pahupton sa imbestigasyon, malawgaw gihapon kini tungod kay nalambigit man niini ang ilang labaw sa DOJ. Gisugyot hinuon niya nga gikan sa hulmahon nga team sa Integrated Bar of the Philippines ang pasusihon sa wiretapped conversation sa binayranay pag-settle sa kaso.

Si Alvarez, atol sa press conference nga gipatawag kagahapon sa mga King, miawhag usab ni Gonzalez sa pagpa-ubos sa lie detector test tungod sa kuwestiyonable niining pagpirma sa resolusyon aron patyon ang kaso batok ni Go.

Matud pa ni Alvarez nga aduna nay desisyon ang Court of Appeals ug ang Supreme Court nga mahimong mapadayon ang kaso, apan nagbuotbuot kini sa pagluwat og resolusyon.

Nagduda usab si Alvarez nga wala mag-agi sa tukmang proseso ang pagluwat sa resolusyon.

Ang resolusyon ni Gonzalez pinetsahan Hunyo 20, 2005, mi-reverse sa joint resolusyon pinetsahan Hulyo 16, 2002 nga nagpakita og "probable cause" batok sa mga Go ug mga kaubanan sa paghiusa niini pagdagit ni King.

Si Alvarez miingon nga ipasaka nila sa Court of Appeals ang resolusyon ni Gonzalez, samtang nagtuon usab sila sa posibleng kasong administratiba batok sa kalihim sa hustisya.