Magsuong prinsipal, maestra nagbugno

Prinsipal ug maestra sa Talisay Central School nagbugno niadtong Miyerkules sa hapon didto sa buhatan sa prinsipal.

Si Maria Linda Hernando magtutudlo sa grade VI nakaangkon og samad sa ulo ug mga bun-og sa iyang lawas, human magkabugno ni Maria Lourdes Epong prinsipal sa maong tunghaan og maguwang ni Hernando.

Si Hernando mitaho sa maong insidente ngadto sa buhatan sa kapolisan sa Talisay. Matud pa niya nga kalit lang siyang giatake ni Epong diin gilabnot ang iyang buhok ug gisagpa ang iyang nawong ug gidarok pa gyud.

Matud ni Hernando nga pirme siyang harason sa suspetsado ngadto sa atubangan sa iyang mga estudyante. Apan si Epong mihimakak sa maong pasangil diin matud niini nga ang biktima maoy miadto sa iyang buhatan.

Si Epong midungag nga dili madawat ni Hernando ang iyang mga patakaran nga giimplementar sa tunghaan.

Si Dr. Elsa Suralta, division superintendent, nagkanayon nga kabahin sa personal nga problema ang giawayan sa duha ug walay labot ang ilang trabaho, hinungdan nga dili siya mohimo og imbestigasyon.