Ex-convict gitumba sa vigilante

Talaan sa mga patyonon sa vigilante nakuhaan na usab og usa human tumbaha ang usa ka ex-convict diha sa usa ka panimalay nga iyang giduwaan og video karera niadtong milabay'ng gabii sa dalan R. Palma barangay San Roque ning dakbayan.

Ang nabulit og samad pinusilan ug gitiwasan mao si Michael Conejos, 20, ulitawo ug lumolupyo sa naasoy'ng lugar kinsa bag-uhay pa nakagawas sa Bagong Buhay Rehabilitation Center.

Usa ka lalaking nagsuot og green fatigue ug helmet nga itom ang gitumbok nga mipusil unom ka higayon sa biktima ginamit ang kalibre 45 pistola ug dayong ikyas luwan sa usa ka motorsiklo.

Base sa gihimong imbestigasyon sa Homicide Section nila ni SPO3 Zenaido Pastorfide ug SPO2 Rey Cuyos ang biktimang si Conejos kasamtangang nagduwa og video karera sa balay ni Macau Linabog dihang kalit nga misulod ang suspek.

Gikatahong gipusil una sa ulo ang biktima apan nakahimo pa sa pagdagan palayo si Conejos padulong sa usa kasikbit nga balay apan gigukod kini sa suspek dayong gitiwasan didto og pusil.

Unom ka mga basiyo sa kalibre 45 nga bala ang narekober sa mga mirespondeng kapolisan diha sa crime scene samtang ang gikatahapan daling miikyas subay sa dalan S. Osmeña ning dakbayan.

Si JO1 Catherine Cintos sa BBRC mitug-an sa Banat News nga nabilanggo si Conejos niadtong 1997 sa duha ka kasong may kalambigitan sa drogas, 1998-2000 kasong pagpangawat ug pagpanulis ug ang katapusan niadtong 2001-2002 sa kaso na usab nga robbery.