Mayores misuporta ni GMA

Bohol - Gipaluyohan sa mga mayor ning probinsya ang padayon nga pagdumala sa nasod ni Presidente Gloria Macapagal Arroyo.

Usa ka resolusyon ang gipalabang sa liga sa mga mayor ning probinsya atul sa ilang tigum sa miaging adlaw diin ilang gipadayag ang padayon nga kompyansa sa liderato ni Presidente Arroyo.

Gipadayag nila nga gikinahanglan hatagan og kahigayon si Presidente Arroyo sa pagpatuman sa programa niini ilabi na gayud kabahin sa ekonomikanhon nga kalambuan.

Si Mayor Josephine Socorro Jumamoy sa lungsod sa Inabanga nga mao usab ang presidente sa liga sa mga mayor maoy mipatawag sa maong tigum.

Nakuha ni Mayor Jumamoy ang suporta gikan sa kaubanan niya nga mayor hinungdan nga ilang nauyonan ang pagpalabang sa maong resolusyon.

Gitumbok usab nila nga ubos karon sa administrasyon ni Presidente Arroyo adunay mga dagkong proyekto nga nalinya alang sa probinsya.

Si Gobernador Erico Aumentado mihangop sa lakang nga gihimo sa mga mayor sa probinsya nga nakakita nga angayan paluyohan si Presidente Arroyo.

Matod pa ni Aumentado nga iyang personal nga iduso ngadto ni Presidente Arroyo ang maong resolusyon.

Gawas sa resolusyon gikan sa mga mayor sa probinsya, dala usab ni Aumentado ang resolusyon nga gipalabang sa Regional Development Council kon RDC.