'Trouble maker' gipatay

Usa ka giingong troublemaker sa Sitio Cabangcalan Barangay Bulacao ning dakbayan gitipi sa wala mailhing mga gikatahapan samtang ang biktima nag-inom.

Ang gipatay giilang si Lito Cabado, 28, ulitawo ug lumolupyo sa naasoy'ng dapit giingong badlungon ug mamareglahay sa ilang lugar matud pa sa kapolisan nga mihimo sa imbestigasyon.

Si PO2 Henry Estoy sakop sa Homicide Section mitug-an sa Banat News nga nag-inusarang nag-inom ang biktima diha sa usa ka payag sa daplin sa dalan dihang kalit nga giduol sa wala mailhing lalaki.

Gikatahong milanit og wala matinong kalibre sa armas de fuego ang gikatahapan dayong pusil upat ka higayon sa luyong bahin sa ulo ni Cabado ug buko-buko hinungdan sa hinanali niining kamatayon.

Yano usab nga mibiya ang suspek diha sa maong dapit, samtang gisubay na karon sa kapolisan ang motibo sa pagpatay.

Si JO1 Catherine Cintos sa Bagong Buhay Rehabilitation Center mitug-an sa Banat News nga wala masulod sa ilang institusyon ang biktima.