Wala na matabang gikan sa kamatayon ang biktimang si Prudencio Gabuya, 50, minyo lumolupyo sa naasoy'ng lugar gumikan sa nainom nga tubig sa kanal ug lapok dihang ginudnod sa suspetsadong si Andres Tabura,48, minyo silingan sa biktima.
Sigun pa ni PO2 Henry Estoy sa Homicide Section sa Banat News ang biktima hubog nga miagi sa usa ka videoke joint nga maoy giimnan sa suspetsadong si Tabura.
Tungod kay managsilingan gikatahong mihapit si Gabuya kang Tabura ug nag-istoryahanay apan misangpot kini sa mainitong panaglalis gumikan kay ang duha pulos na hubog.
Miuli si Gabuya sa ilang balay ug dihang mibalik nagbitbit na kini og 26 pulgadas nga bolo dayon walay daghang pahibalo gitigbas si Tabura diha sa ulo.
Si Tabura bisan sa dakong samad nga naangkon sa tuong bahin ibabaw sa dunggan nakabantay sa ikaduhang pag-atake sa biktima ug dinhi iya kining gilayog ug nadis-armahan.
Diha na mahitabo ang giingong panagbuno sa duha nga miabot sa may lapukong kanal diin ginudnod ni Tabura ang nawong ni Gabuya sa lapok hangtud nga nawad-an kini og panimuot.
Ang mga tawo daling midala sa duruha sa Cebu City Medical Center apan si Gabuya nakabsan gyud sa kinabuhi samtang si Tabura kasamtangang nagpaalim sa maong tambalanan.