Protesta vs prinsipal midako

Mga ginikanan sa San Isidro Elementary School sa Talisay wala mopatungha sa ilang mga anak kagahapon agi'g protesta batok sa prinsipal sa maong tunghaan.

Dul-an sa 200 ka mga ginikanan sa 600 ka mga estudyante sa maong tunghaan mipadangat sa ilang reklamo kagahapon sa buntag ngadto kang City Legal Officer Aurora Econg batok sa prinsipal nga si Dr. Velma Taboada.

Matud sa petisyon sa mga ginikanan, arogante si Taboada ug dili na moangkon sa gipanulti niini, insultador, walay baruganan ug walay respeto.

Si Taboada wala moatubang aron paghimakak sa maong pasangil. Nanirado kini sa bintana ug pultahan sa iyang opisina.

Si Division Superintendent Elsa Suralta miadto sa tunghaan uban sa duha ka opisyal sa Department of Education aron himuon ang dayalogo, apan mibiya si Suralta paghiabot sa media.

Si Econg miingon nga ang Local School Board mosusi sa pamasangil sa mga ginikanan.