Si Supt.Pablo Labra sa pakighinabi sa mga tigbalita mibutyag nga giangkon ni Torres nga nakahibalo silang diha magpundo og kwartang isweldo ang kadaghanan sa mga magpapatigayon.
Sigun pa ni Torres naa gyud silay mga kauban nga maniid diha sa sulod sa mga bangko atol nga duol na ang adlaw sa pagsuweldo aron pagtan-aw kun kinsa ang mga tawong nag-withdraw og dagkong kantidad.
Matud pa ni Torres wala sila mag-apas og minilyon nga matulis sanglit nasayod sila nga kun moabot na og milyon ang kuwartang gidala sa mga mo-withdraw kasagaran ikarga kini sa armored car ug may mga gwardiyang mo-escort.
Apan niadtong insidente sa pagpanulis sa P2 milyones nga payroll sa usa ka patigayon diha sa eskina H.Cortez ug A.S. Fortuna sa dakbayan sa Mandaue sa milabay'ng Biyernes tsambahan lang nga ingon niadto kadako ang gidala sa mga biktima ug walay guwardiya.
Mibutyag si Torres matud pa ni Labra nga binuhatan sa notado usab nga tulisang si Danny Limotan ang maong operasyon susama sa gisuspetsahan na sa kapolisan sa dakbayan sa Mandaue
Giingong ang uyab ni Limotan maoy misulod sa Metrobank ug maoy naniid kun kinsa ang mikuha og dakong kuwarta.
Gibutyag usab ni Labra nga si Limotan kaniadto kauban ni Rey Torres apan gumikan sa panag-away tungod sa babaye nagkabuwag kini ug nagtukod og kaugalingong grupo.
Gituohang ang grupo ni Limotan naglangkob nila ni Junard Saladaga, Nardo Abapo, Tito Jayme, Benny Tobigon ug Jemuel Cardosa alyas Roldan Villanueva kinsa nakauban ni Torres sa pagsuway pagpanulis sa milabay'ng tuig apan nadakpan sa kapolisan.
Samtang gibutyag usab nga si Ladimer Gamanay alyas Cocoy kinsa kanhi kauban ni Limotan ug Torres giingong wala na mouban sa grupo ni Limotan tungod kay nagkaaway sila niadtong milabay'ng tuig gumikan sa panagbahin sa natulis didto sa Tangub City. Q