7 mipuga sa rehab

Pito ka mga rehab patients sa Center for Ultimate Rehabilitation of Drug Dependents mieskapo kagahapon sa hapon gumikan sa reklamong abusado ang mga warden kun guardians sa naasoy'ng institusyon.

Duha sa pito ka nakaeskapo ang nasikop pagbalik sa mga sakop sa Theft and Robbery Section Special Operations Team(SOT) pinanguluhan ni SPO2 Venancio "Ben" Abella, SPO1 Arnil Coloscos, PO3 Geoffrey Diola,PO3 Raul Cosido diha sa Villagonzalo Dos Barangay Tejero ning dakbayan.

Ang nasikop pagbalik giilang sila si Ramonito Regis,34, taga Villagonzalo Dos barangay Tejero ug Mark Arnold Villariza, taga dalan Figueroa barangay Sawang Calero ning dakbayan.

Sa pakighinabi sa Banat News mibutyag sila si Regis ug Villariza nga magpatahud gyud ang mga gwardiya bisan moagi lang silang mga pasyente diha sa atubangan niini.

Gikatahong gikinahanglan gyud nga silang mga pasyente mo-"sidestep" o di ba kaha mo-"hands-back" kini bisan sila nangaon ug kundili nila kini himuon silutan sila og 50 ngadto sa 100 ka push-ups.

Lakip sa ilang gireklamo mao ang kadugay sa programa nga duha ka tuig kay matud pa nausik ang ilang mga adlaw nga walay gihimo diha sa sulod ug ingon man ang kamingaw sa ilang mga kabanay.

"Ang programa taas kaayo, duha na ka tuig ko diha sa sulod sayang kaayo ang mga adlaw,unya ang mga guardian(gwardiya) magpatahud kaayo, boluntaryo man mi nagparehab pero sobra kaayo ilang higpit," asoy pa ni Regis.

Gikatahong ang mastermind sa pag-eskapo mao ang usa ka pasyenteng gikan pa sa Bagong Buhay Rehabilitation Center nga si Eddie Tabal taga barangay Guba ning dakbayan.

Giingong gidasmagan sa mga pasyente ang gwardiya dihang misulod ang usa sa mga kawani gikan nangompra sa gawas diha sa visiting area hinungdan sa karambola sa sulod ug nakaipsot ngadto sa basketball court ang onse kanila.

Si Tabal maoy nakakuha sa pungpong sa yawe sa kandado sa gate nga gisab-it diha sa gamay'ng lawak sa gwardiya maong nakagawas ang pito samtang ang upat kanila napugngan.

Gikan didto nangikyas sila si Regis ug Villariza luwan sa usa ka taxi ug ang uban mikapyot sa mga PUJ apan nadakpan sila diha sa Tejero gumikan sa pagtawag sa igsuon ni Regis nga Glenda del Mar og polis.

Nahadlok si del Mar nga madagmalan ang iyang igsuon kun dili kini motahan, matud pa ni del Mar nga nagbayad sila og P4500 matag bulan ug ila pa ang gastos sa gamit ug tambal sa iyang igsuon.

Walay bisan usa sa mga sakop sa CUREDD ang mihatag og pamahayag kalabot sa insidente samtang padayon pang gipangita ang lima ka mga nakaikyas nga sila si Glenn Nerissa, Referdo Legaspe, Edward Niel Teves, Eddie Tabal ug Arvic Gekin.

Kini maoy ikaduhang higayon nga naeskapuhan ang maong institusyon gumikan usab sa abuso sa mga gwardiya, taas kaayong programa ug ang patakaran nga wala kauyuni sa mga pasyente.