Kon malagpot si Gloria: Mindanao andam nang mo-republic

"Federal Republic of Mindanao," mahimugso kun ugaling pugson gyud og palagpot sa oposisyon si Presidente Gloria Arroyo sa pwesto gumikan sa giingong "kahakog sa gahom" sa maong grupo.

Si Davao City Mayor Rodrigo Duterte kinsa inila sa pagka-estrikto niini sa pagpatuman sa kahapsay ug kalinaw diha sa iyang ginsakupan mibahad nga mabuwag gyud sa Pilipinas ang Mindanao kun mabalintong ang administrasyon ni Arroyo.

Sa interbyu sa TV Patrol sa ABS-CBN adtong Domingo gisubli ni Duterte nga pinaagi sa gilusad nga kalihukang "One People, One Mindanao," mamahimong makabarog ang maong isla aron mahimong magkinaugalingon gawas sa mga kamot sa kauluhan.

Nangangkon usab si Duterte nga andam na ang selyo nga gihimo alang sa "Federal Republic of Mindanao," ug duna na usab sila'y nahimong kaugalingong nasudnong awit ug bandila nga dunay mga gagmayng bituon nga nagrepresentar sa tanang tribu sa Mindanao.

Ang mga isyu karon batok kang Arroyo maoy nakaingon sa paglusbo pagbalik sa ekonomiya sa nasud human sa tulo ka tuig nga kalambuan sukad sa iyang pagdumala suma pa ni Duterte.

Ang oposisyon ug mga kritiko sa pangulo nangusog sa pagpapha kang Arroyo diha sa Malacañang tungod sa pasangil nga pagpanikas niini niadtong nakalabay'ng piniliay ug ang isyu sa jueteng.

Si Duterte nagkanayon nga sukad pa kaniadto ang Mindanao nagsunod-sunod lang sa kun unsay gusto sa naa sa kauluhan apan ning panahuna kinabag-an sa taga Mindanao ang mipadayag nga napul-an na sa maong sistema.

Gibahad ni Duterte nga dili ilhon sa Mindanao ang bisan kinsang ihulip kang Arroyo.

Dinhi sa Sugbo pipila usab sa mga yanong lumolupyo ang mipadayag sa susamang lakang kini mao ang mabuwag sa sistema sa Imperial Manila apan wala moklaro kun unsay buot nilang ipasabot sa "pagbuwag."q