Problema sa basura tukion

Tagbilaran City - Mga opisyal sa dakbayan sa Tagbilaran ingon man sa silinganan nga mga lungsod gikatakda nga makigtagbo sunod semana sa kadagkoan sa Department of Environment and Natural Resources ingon man sa Philippine Tourism Administration kon PTA.

Si Kongresista Edgar Chatto sa unang distrito sa probinsya sa Bohol miingon nga ang gikatakda nga tigum tinguha nga matuki pag-ayo ang hiniusang lakang pagpalambo sa paghipos sa basura.

Giangkon ni Chatto nga usa kini sa dakong problema nga giatubang dili lang sa dakbayan sa Tagbilaran kon dili sa uban usab nga lugar.

Matod pa ni Chatto nga muapil siya sa maong tigum sa ingon mapaabot usab ang iyang huna-huna kabahin niini.

Midugang si Kongresista Chatto nga gikinahanglan gayud nga adunay pagtinabangay sa mga opisyal sa iyang distrito.

Gipasalig usab sa kongresista nga andam siya nga mutabang aron gayud magmalampuson ang maong proyekto.