Sugyot sa mga negosyante gipaboran

Bohol - Gipaluyohan ni Kongresista Edgar Chatto sa unang distrito ning probinsya ang panawagan sa sektor sa mga negosyante nga kinahanglan tan-awon nila pag-ayo ang mahimong epekto sa dagan sa ekonomiya niining nagpadayon nga imbestigasyon sa nakontrobersiyal nga pakigsulti ni Presidente Gloria Macapagal Arroyo sa usa ka opisyal sa Commission on Elections.

Si Kongresista Chatto miingon nga nakita niya nga balido ang gihimong panawagan sa sektor sa mga magpapatigayon nga nabalaka na karon sa dakong kadaot sa ekonomiya.

Matod pa ni Chatto nga kon ipadayon man gayud nila ang imbestigasyon sa ubos balay balauranan kinahanglan gayud nga deretso nga magtan-aw sa importanteng mga butang.

Midugang ang kongresista nga kon aduna may reklamo nga ipaabot batok ni Presidente Arroyo adunay hustong lugar diin angayan isang-at ang maong reklamo.

Gihimo niya nga sanglitanan ang pagpahigayon sa "impeachment" nga maoy nalatid sa balaod.

Nagkanayon si Chatto nga usa hinoon siya sa nagtinguha nga mugawas ang matuod taliwala niining tanan nga kontrobersiya nga mitumaw sa pagka karon.