Balay gilabay'g granada

Gisuspetsahang mga rebeldeng New People's Army (NPA) ang milabay og granada sa usa ka panimalay sa barangay Mainggit, Toledo City niadtong Martes sa alas 10:00 sa gabii.

Si PO1 Ruel Suquib, desk officer sa Toledo City Police mibutyag sa Banat News nga ang panimalay nga gipabuthan og granada gipanag-iya ni Luis Jabonilla.

Hinuon mga aplyanses ug uban pang kabtangan ingon man ang hapit katunga sa panimalay maoy nadaot ug nabungkag sa kakusog sa boto.

Ang kapitan sa barangay Mainggit nga si Hayle Baron, kanhi polis sa Toledo City, maoy mikaratel dayon og dagan ngadto sa Toledo City police pagpangayog panabang.

Apan wala nay nadakpan ang kapolisan sa ilang pag-adto sa maong lugar.

Ang mga nakasaksi mibutyag nga may tulo ka wala hiilhing tawo diha sa palibot sa panimalay sa biktima sa sayo pang gabii.

Dihang namingaw ug natulog na ang pamilya sa biktima, milihok dayon ang maong mga tawo paglabay ug pagpaboto sa granada.

Mitugpa kini sa sulod sa balay apan walay naangin nga kinabuhi sa sulod sa balay.

Gisukit sa kapolisan ang biktima kon may atraso ba siya og ang iyang pamilya ngadto ni kinsaman, apan mibutyag kini nga wala.

Ang taga Mainggit giingon pirme nang makapaniid nga magabii may mga tawo na nga magsuroysuroy sa ilang palibot nga magsakay og mga kabayo.

Matud pa sa mga nakasaksi nga may katahap silang mga rebelding NPA ang milabay og granada sa balay ni Habonillo.

Kasagaran niining maorag mga "cowboy" nga mga tawo, napanid-an na sa taga barangay Casoy, Campo 8 ug uban pang kasikbit nga mga lugar sa Mainggit.