Mga raliyista hilom paglubong sa Cardinal

Gihatud na kagahapon sa iyang lubnganan ang giisip nga "religious liberator"nga si Archbishop Jaime Cardinal Sin didto sa ilawom sa Manila Cathedral sa Intramuros diin siya milingkod sulod sa taas nga panahon.

Nahikalimtan sa makadiyot ang init pa kaayong isyu sa pag-angkon ug pagpangayo og pasaylo ni Presidente Gloria Arroyo mahitungod sa nahimong sipyat kalabot sa kontrobersyal nga tape.

Gidudahang ang mga think-tank sa Malacañan maoy mituyo nga iatol ang pagtubag ug pagpangayo ni Arroyo og pasaylo sa katawhan kabahin sa isyu sa "Hello Garci" tape nga besperas sa lubong ni Sin.

Ang mga supporter sa oposisyon ug mga kritiko wala maka-react sa public apology sa pangulo sanglit kinatibuk-an sa nasud naubos sa estado sa pagbangutan isip pagtahud sa adlaw'ng paglubong ni Sin.

Si Arsobispo Gaudencio Rosales sa Manila kinsa maoy mihulip kang Sin maoy nangulo sa seremonyas. Si Sin ,76 anyos, gisulod sa usa ka mahogany nga lungon gipahimutang tupad sa lubong ni Arsobispo Gabriel Reyes ang labing unang Pilipinong Obispo sa nasud.

Si Cebu Archbishop Ricardo Cardinal Vidal mipalanog sa iyang eulogy sa pag-ingon nga sama sa awhag ni Sin, magpadayon ang katawhang Pilipino sa pag-abante aron makab-ot ang gisugdan sa namatay'ng cardinal.

Matud pa ni Vidal nga si Sin maoy mihatag og kahayag aron makita kung unsay makayang himuon sa katawhang Pilipino.

Kahinumduman si Sin maoy usa sa mga giisip nga nakatampo og dako sa duha ka mga dagkong Edsa Revolution sa nasud nga nakapausab sa kasaysayan sa Pilipinas.

Si Presidente Arroyo ug Bise Presidente Noli de Castro nangulo sa mga opisyal sa kagamhanan sa paghatag og estate honors kang Sin. Ang lungon ni Sin gitaptapan sa bandila sa nasud gikarga sa usa ka karosa nga giguyod sa kabayo ug gisundan sa mga "military honor guards." si Arroyo mihatag sa bandila ngadto kang Ramon Sin nga manghod ni Cardinal Sin..

Isip paglantaw sa iyang dakong kontribusyon sa nasud gipasidunggan si Sin sa militar og "21-gun salute."

Gikatakdang buksan unya sa publiko ang nitso diin ipahimutang si Sin.