Makatabang sa turismo

Leyte - Giangkon ni Secretary Joseph Ace Durano sa Department of Tourism nga adunay dako nga ikatabang sa pangpalambo sa turismo sa usa ka lugar ang mga drayber sa pangpubliko nga sakyanan nga nagbiyahian sa kalungsoran.

Si Secretary Durano miingon nga usa kini sa mga hinungdan nga naningkamot karon pag-ayo ang iyang buhatan nga maedukar pag-ayo ang mga drayber.

Matud pa ni Durano nga ang mga turista kasagaran musakay og mga sakyanan de pasaheruan,taxi og uban pang matang sa transportasyon.

Midugang si Durano nga kon pahimuslan sa mga drayber ang mga turista adunay dako nga posibilidad nga dili na kini mubalik sa nasud.

Gumikan niini si Durano miingon nga ang iyang buhatan naningkamot karon nga mahibalo ang mga drayber nga aduna sila'y dakong papel sa kalambuan sa turismo dili lang sa ilang dapit kon dili sa tibuok nga nasud.