Ipalabay ni chief ang 2 ka polis

Irekomendar ni Cebu City Police Office acting chief Supt. Melvin Gayotin ang pagpabalhin og diretso gawas sa siyudad sa Sugbo ang duha ka mga polis nga nasakpan sa entrapment operation nga nangilkil ngadto sa usa ka gituohang tigpayuhot og gidiling drugas.

Matud ni Gayotin nga nahinabi sa mga tigbalita sa pagbisita niini sa City Halll kagahapon sa buntag gibutyag niini nga tuyo ni Gayotin sa pagpabalhin og destino ni PO1 Leo Batigalao og PO2 Robert Cuyos gawas sa Sugbo aron dili kini maka-impluwensiya sa gipahigayong imbestigasiyon.

Matud ni Gayotin nga duna pay usa ang iyang ilakip sa irekomendar nga ipabalhin og destino gawas sa Sugbo nga gibutyag niya nga apil sa negosasyon sa pagpangilkil sa magtiayong Nabua. Apan nagdumili pagtug-an si Gayotin sa ngalan ning maong polis nga subay sa ilang imbestigasyon apil sa maong kahiwian hinungdan nga ipalabay usab gawas sa Sugbo.

Nasayran nga nasikop sa akto sa mga sakop sa NBI sila si Cuyos ug PO1 Batigalao sa may B. Rodriquez niadtong milabay'ng hapon nga midawat sa akto sa P10 mil nga marked money gikan sa biktima.

Apan gibasura sa piskaliya ang kasong gisang-at batok kang Cuyos tungod kay matud pa wala kini moapil sa negosasyon ug igo lang kining nagmaneho sa motor nga gisakyan ni PO1 Batigalao.

Si Cuyos kasamtangang nadestino sa Drug Enforcement Unit ug samtang si PO1 Batigalao nadestino sa Vice Control Section sa CCPO.

Tungod niini, mipasalig si Mayor Tomas Osmeña paghatag og P50 mil nga ganti ngadto sa mga ahente sa NBI-7 nga responsable sa pagkasikop sa mga badlongong polis.