Ang maong bata nga nag-edad og 12 anyos kasamtangan karong giatiman sa Womens Desk pinanguluhan ni PO1 Virgilia Albaracin kinsa maoy gidad-an sa usa ka concerned citizen nga nakakaplag sa bata niadtong milabay'ng gabii.
Si PO1 Albaracin mibutyag sa Banat News nga daghang mga bun-og ug lagom lagom sa kalawasan ang biktima ug kini mipasangil nga binuhatan kini sa iyang inahan sukad nga namatay ang amahan niini.
Sa samang report, ang giingong milayas nga bata sa ilang balay diha sa dalan Katipunan Barangay Labangon ning dakbayan sa Sugbo niadto pang milabay'ng gabii .
Sa usa ka lokal nga sibyaanan sa dakbayan gibutyag nga anak ang maong bata sa notadong badlungon nga gipatay sa mga gituohang vigilante niadtong Marso.
Giingong anak ang bata ni Vileto Ancajas alyas Lalay kinsa gitumba sa mga gidudahang vigilante diha sa dalan Sanciangko barangay Parian ning dakbayan.
Si PO1 Albaracin nagkanayon nga makita gyud sa panagway sa bata ang abusong nahiaguman base usab sa alegasyon niini nga giingong gihimo sa iyang inahan.
"Emotionally unstable gyud siya tungod sa pagdagmal sa iya kunong inahan, gihimo kuno siyang punching bag actually naa man gani siya'y mga "bruises"," asoy pa ni Albaracin.
Ang maong bata gikatakdang dad-on sa kapolisan sa Department of Social Welfare and Development (DSWD) alang sa dugang pag-atiman kaniya aron kini makalimot sa abusong naagian.