Dumpit mi-turnover sa iyang mga armas

Pormal nang gi-turnover kagahapon sa buntag sa kontrobersiyal nga polis nga si SPO1 Adonis Dumpit ang iyang mga service firearms nunot sa pagkasuspenso niya sa katungdanan sugod niadtong Hunyo 16 ning tuiga.

Gi-turn-over ni Dumpit ang iyang .357 nga rebolber ug .45 nga pistola ngadto sa property custodian sa Cebu City Hall. Gisunod usab niya og turn-over ang M-16 nga riple nga giisyu sa Cebu City Police Office kaniya.

Sa wala pa masuspenso, si Dumpit nadestino sa Security Service Group ug maoy nagsilbeng bodyguard ni Mayor Tomas Osmeña.

Ang pagkasuspenso ni Dumpit naggumikan kini sa kasong grave misconduct tungod sa pasangil nga iyang gipusil ang usa ka Wilson Borja sa pier area.

Si Dumpit mitug-an sa mga tigbalita nga andam niyang dawaton ang tanyag ni Osmeña nga magsilbe siyang trainor sa mga polis aron aduna siyay mabuhi sa iyang pamilya, bisan niining iyang pagkasuspenso.