Gayotin di manalipod sa 2 ka 'nangilkil'

Dili panalipdan ni Acting Cebu City Police Office Director Melvin Gayotin ang duha ka mga sakop sa kapolisan nga nasikop sa mga sakop sa National Bureau of Investigation 7 sa milabayng gabii atol sa entrapment operation sa maong ahensya gumikan sa pasangil nga pagpangilkil.

Si Supt. Melvin Gayotin sa pakighinabi sa Banat News nag-ingon nga kun mogawas sa kaugalingong administrative investigation nga wala magsubay sa husto sila si PO2 Robert Cuyos ug PO1 Leo Batigalao dili niya kini tabangan.

"Wala ko'y duphan kay wala ko magtudlo nila sa paghimo og binuang, duphan nako sila kung naa sila'y proof nga proper ang ilang lakaw," bahad pa ni Gayotin.

Hinuon siya miklaro nga dunay pagahimuong imbestigasyon ang CCPO sa aspeto sa administratiba kun duna ba sila'y kasaypanan nga nahimo apan ang sa kasong kriminal adto na lang sa NBI-7.

Ang duha ka mga polis gidakop sa NBI-7 pinanguluhan ni Director Medardo Delemos human moreklamo ang managtiayong sila si Dalia ug Francisco Nabua nga sila gipangayuan sa duha og P100 mil aron dili sikupon si Dalia tungod kay gipasanginlan kining drug pusher.

Mialegar ang managtiayong Nabua nga adtong Mayo 14 gisikop si Francisco diha sa A. Lopez Calamba ning dakbayan sa duruha apan gimaniobra kini sa mga polis bugti sa P95 mil aron dili pasakaan og kaso.

Apan niining bag-uhay lang gipangayuan na usab sila sa mga polis tungod kay dakpunon nila si Dalia, ning tungura mi-negotiate ang managtiayon nga P20 mil lang kay wala na silay kwarta.

Hangtud nga nagkauyon nga P30 mil lang ug didto ihatud sa gasolinahan sa dalan B. Rodriguez ning dakbayan, ning tungura nasumbong na sa managtiayon ngadto sa NBI-7 ang pagpangilkil maong nasikop ang duruha.

Nasuta sa mga tigbalita nga wala mo-reflect sa blotter sa Vice Control Section ang gibutyag sa magtiayon nga sila nadakpan adtong Mayo 14 hinungdan sa pagtumaw sa pagdudang dunay nanimahong langsa sa maong operasyon.