Nihit nga tubig

Ubay, Bohol - Giangkon sa mga mulopyo ning lungsod nga nag-antos gihapon sila sa kanihit sa suplay sa tubig gumikan kay wala pa gayud masinati niini ang pag-ulan.

Samtang ang pipila ka lungsod sa probinsya nakasinati na karon sa kusog nga pag-ulan apan giingon nga wala pa kini masinati sa lungsod sa Ubay.

Ang mga mulopyo ning lungsod maoy unang mipaabot sa ilang reklamo bahin sa dakong kadaot nga ilang nasinati sa tanom niini sa umahan.

Gani daghan nga mga mag-uuma ang mipadayag sa ilang reklamo ngadto ni Gobernador Erico Aumentado.

Mimando hinoon si Gobernador Aumentado nga susihon pag-ayo kon unsa gayud nga kadaut ang nasinati sa tanom sa umahan.

Gipasabot sa gobernador nga mao kini ang basihanan sa ilang himoon nga aksyon.

Nagkanayon si Gobernador Aumentado nga naningkamot karon ang iyang buhatan nga mahatagan og ayuda kadtong mga mag-uuma sa nagkalain-laing mga lungsod sa probinsya nga nakasinati sa samang problema.