Dumpit tabangan gyud - Tom

Gipasalig ni Mayor Tomas Osmeña nga iyang himuon kutob sa iyang mahimo aron katabangan si SPO1 Adonis Dumpit nga gisuspenso og usa ka tuig sa katungdanan sa military Ombudsman may kalambigitan sa kasong grave misconduct nga iyang giatubang gumikan sa pagpusil sa usa ka Wilson Borja.

Mi-epekto ang suspension order niadtong Hunyo 16.

Gibutyag ni Osmeña kagahapon nga dili usa ka maayong balita ang pagsuspenso kang Dumpit tungod kay alang sa mayor makaapektar kini sa kahusay ug kalinaw sa dakbayan.

Gidayeg sa mayor ang impresibong binuhatan ni Dumpit nga agresibong mogukod ug motumba sa mga gitumbok nga notadong mga kriminal dinhi sa dakbayan.

Usa sa nahunahunaan ni Osmeña ang pag-hire kang Dumpit isip sakop sa Civil Security Unit sa City Hall samtang gipaubos pa siya sa usa ka tuig nga pagkasuspenso og ang laing plano sa mayor mao ang paghimo kang Dumpit nga maoy tigbansay-bansay sa training program sa siyudad sa kapolisan nga nadestino dinhi sa dakbayan.