2 polis nangilkil ipataktak gyud

Morekomendar si Konsehal Augustus Pe ngadto kang PNP chief Arturo Lomibao alang sa pagpataktak sa katungdanan sa duha ka mga polis nga nadestino sa siyudad sa Sugbo nga nasakpan sa akto nga nangilkil sa gidudahang tigpayuhot og gidiling drugas.

Ang National Bureau of Investigation maoy nakasikop nila ni PO1 Leo Batigalao nadestino sa Vice Control Section ug PO1 Robert Cuyos sa Drug Enforcement Unit (DEU) pinaagi sa usa ka entrapment operation.

Matud ni Pe dihang nahinabi sa Banat News nga ipasaka na sa NBI-7 ang robbery extortion batok sa maong duha ka polis nga nasikop gyud sa akto pinaagi sa entrapment operation niadtong miaging alas 6:00 sa gabii sa usa ka gasoline station sa may B. Rodriguez.

Gibutyag ni Pe nga siya maoy gireklamohan sa biktima, ang magti-ayong Francisco ug Andalia Nabua.

Mireklamo ang biktima tungod kay gidakop kini niadtong Mayo 14 sa alas 2 sa hapon human gialegahan nga tigpayuhot og gidiling drugas diha sa Calamba apan gikilkilan kini og P95 mil sa duha ka polis bugti sa pagbasura sa kaso ug pag-release niini.

Niadtong miaging adlaw matud sa konsehal subli na usab kining gi-pick up sa maong duha ka polis ug gipangayo-an og P30 mil apan nihangyo ang biktima hinungdan nga P10 mil ang gikasabutang ihatag.

Atol sa binayranay sa gasoline station sa dalan B. Rodriguez gi-entrap ang duha ka polis hinungdan sa ilang pagkasikop.