2 patay sa tinadtaray, pinuspusay

Duha ka tawo nangamatay atol sa birthday party human kini magkarambola gumikan sa kahubog ug misangpot kini sa pinuspusay ug tinigbasay diin usa kanila ang nagutad-gutad ang lawas samtang patay usab ang nag-birthday. Nahitabo kini adtong milabay'ng gabii sa lungsod sa Dumanjug.

Parehong nakabsan sa kinabuhi mao sila si Anacleto Segovia, kinsa maoy nagsaulog sa iyang ika-41 anyos nga adlawng natawhan ug ang silingan niining si Estrello Maquipoten, 25, ulitawo, barkada sa anak ni Segovia.

Sigun pa ni SPO4 Juan Casipong, ang imbestigador sa Dumanjug Police sa pakighinabi sa Banat News, giimbitar pa sa anak ni Segovia si Maquipoten sanglit birthday man sa amahan niini.

Apan gumikan sa kahubog mitumaw ang panaglalis tali nila ni Segovia ug Maquipoten ug dihang nasuta sa naulahi nga wala siya'y dag-anan kang Segovia mikuha kini og dos por dos nga puspos dayong hapos sa ulo ug kalawasan sa nag-birthday hinungdan sa pagkahagba niini sa yuta ug gibawian sa kinabuhi.

Misuway unta sa pag-ikyas si Maquipoten apan sa pagdagan niini gikatahong nasangit sa hayhayan ang liog niini hinungdan nga naabtan kini sa manghod sa iyang kabarkada nga si Allen, 22, anak ni Segovia.

Si Allen sa pagkahibalo sa nahitabo sa iyang amahan daling nakakuha og pinote dayong gukod ngadto kang Maquipoten kinsa nahayang tungod sa hayhayan ug diha-diha gibugha ang buko-buko niini atol sa pagbangon.

Dihang natumba ang biktima misuway kini sa pagsagang sa pinote apan napuno hinuon kini sa tinigbasan hangtud nga malup-og ug gitagud-tagud siya og tigbas ni Allen hangtud nakabsan sa kinabuhi.

Human sa insidente malinawong mitahan si Allen Segovia sa kapolisan ug kasamtangang nabilanggo sa Dumanjug Police Station.