15 anyos gipusil sa ulo

Laing gituuhang krimen may kalambigitan sa fraternity mikalas sa usa ka kinse anyos nga lalaki diha sa dalan Rizal Barangay Poblacion ning dakbayan sa milabayng gabii.

Patay nang nadangat sa Danao General Hospital ang biktimang si Christopher Pinote Gacrama,lumolupyo sa sitio Cambiohan sa samang barangay gumikan sa usa ka samad pinusilan diha sa ulo.

Tulo ka mga wala hiilhing batan-ong lalaki ang giingong mihimo sa krimen kinsa maoy gikaistorya sa biktima nianang tungura.

Sa imbestigasyon ni SPO3 Ramerito Ramonida sa Danao Police matud pa ni PO3 Reynaldo Teres sa Banat News nagkanayon nga nag-istorya pa ang biktima ug ang mga suspek apan sa wala igong hinungdan kalit nga may usa sa tulo ang mipusil ug dul-it sa ulo ni Gacrama.

Wala pa matino sa kapolisan kun may kalambigitan ba sa fraternity ang insidente apan ang maong lugar nga nahitaboan nabaniog na kaniadto pa nga abtanan ug maoy kasagarang mahitaboan sa pangkarambola tali sa mga fraternity sa mga batan-on.