Kardinal Sin mipanaw na

Usa sa mga impluwensya nga sakop sa simbahang Katoliko dinhi sa nasud mitaliwan na tunga-tunga niining init nga sitwasyon sa nasud nga iyang gialagaran human sa 27 ka tuig nga pagserbisyo.

Si kanhi Arsobispo Jaime Cardinal Sin mitaliwan sa edad nga 76 anyos kagahapon sa buntag alas 6:20 diha sa Cardinal Santos Memorial Medical Center sa Greenhills, San Juan.

Si Sin dunay sakit sa kidney ug usa usab siya ka diabetic sa dugay'ng panahon ug maoy hinungdan nga wala siya makatambong sa conclave of cardinals didto sa Roma alang sa pagpili og bag-ong Santo Papa adtong milabayng Abril.

Gihulagway nga ang kamatayon ni Sin mao usab ang mamahimong sinugdanan sa pagkunhod sa religious activism diin makitang nahimong kritiko sa makadaghan ng higayon ang simbahan batok sa mga polisiya sa gobiyerno.

Adtong Pebrero 1986 nangulo si Sin sa pagpalagpot sa kanhi diktador nga si Ferdinand Marcos aron sa pagpakgang sa panagsangka sa duha ka paksyon sa militar nga midapig sa mga tawo ug sa rehimeng Marcos.

Tungod sa iyang pamahayag diha sa mga sibyanan sa iyang pagsuporta sa mga pwersa sa militar nga supak ni Marcos nahimo kining mitsa sa mga tawo aron momartsa didto sa nabaniog nga Edsa Revolution nga maoy nakapalagpot sa rehimen ug ang paghulip ni Corazon Aquino kang Marcos.

Gipanganak si Sin adtong Agosto 31,1928 didto sa New Washington, sa probinsya sa Aklan sa iyang mga ginikanan nga sila si Juan Sin ug Maxima Reyes Lachica. Siya maoy ika-pito sa siyam ka magsuon.

Mitapos si Sin sa pagkapari ug diha usab maordinahi sa Saint Vincent Ferrer Archdiocesan Seminary sa Jaro, Iloilo City adtong Abril 3,1954, nahimo siyang Arsobispo sa Manila adtong Marso 19,1974 atol sa pag-init sa Martial Law ug nahimong Cardinal adtong Mayo 26,1976.

Giingong suod nga managhigala sila si mitaliwang Santo Papa nga si Juan Pablo Segundo tungod sa susamang panglantaw ug katuyuan alang sa simbahang katoliko.