Protektor sa sugal sa Bohol ipaila

Bohol - Gimando ni Gobernador Erico Aumentado nga ilhon sa kapolisan kadtong mga opisyal sa lungsod nga giingong protektor sa sugal nga gikabuangan karon sa mga mulopyo sa nagkalain-laing mga barangay.

Si Gobernador Aumentado miluwat sa maong kamanduan human makadawat og reklamo ang iyang buhatan sa giingong naghitak nga sugal sa kalungsoran.

Laing gikabalak-an sa gobernador mao ang pagtumaw sa giingong mga opisyal nga gawas nga naghatag niini og proteksyon mao usab ang utok sa operasyon niini.

Usa ang lungsod sa Ubay sa giila nga naghitak kining ilegal nga sugal nga gitawag karon ug suetres.

Matud pa ni Gobernador Aumentado nga ang kapolisan maoy iyang gitahasan paghatag kasulbaran niining maong problema.

Hinuon daghan ang nag-ingon nga angayan usab mabasol ang katawhan nga kanunay gihapon sa pagpalit sa numero sa ilegal nga sugal.

GRAND PRIZE. Mao kini ang hulagway nga gikuha ni FREEMAN/Banat News photographer Joy Torrejos nga midaog sa grand prize atol sa Mantawi Festival photo contest. Si Torrejos nakadawat og tropeyo ug cash prize nga P20,000 gikan sa kagamhanan sa Mandaue City ug Department of Tourism.