Basurang wa mabulag di kolektahon

Ang kadagkoan sa Department of Public Services mimando na sa ilang mga garbage collectors nga dili kolektahon ang basura nga wala ma-segregate diha sa upat ka barangay dinhi sa dakbayan nga gihimong "pilot area" sa pagpahigayon og dry run sa pagpatuman sa Solid Waste Management Act.

Si Engr. Roger Legaspi, ang hepe sa DPS solid waste division mitug-an sa DyLA nga ang ilang garbage collectors gimandoan niya nga dili kolektahon ang mga basura gikan sa barangay Carreta, Tejero, Duljo-Fatima ug Mambaling kon wala magbuwag-buwag kadtong madunot ug dili madunot.

Sayo pa si Vicente "Bimboy" delos Santos mipahibalo nga bisan sa upat ka barangay nga gihimo nilang "pilot areas" wala gihapon mapatuman ang pag-segregate sa mga basura, gani duna pay mga lumulopyo nga milabay gihapon og basura diha daplin sa karsada.

Kun wala man mapatuman ang tukmang lagda sa paghipos sa mga basura sa maong upat ka barangay nga gihimong pilot areas, mas labaw na sa ubang kabarangayan.

Si Legaspi miingon nga sugod sa Hulyo 1, kadtong mga opisyal sa kabarangayan nga mapakyas gihapon sa pagpatuman sa tukmang lagda paghipos sa basura diha sa ilang mga dapit, pasakaan nila og kaso tungod sa paglapas sa Republic Act 9003.

Matud ni Legaspi nga ang mga sakop sa gimugna nga Cebu City Environment Sanitation Enforcement Team kon CESET maoy pangayoan nila og report kon unsa nga mga barangay dinhi sa dakbayan nga ang mga opisyal napakyas sa pagpatuman sa solid waste management act.

Ubos sa kasabutan, ang mga sakop sa CESET nga makadakop og malapason sa balaod kabahin sa basura - ilabi na ang city ordinance 1361 - makabahin og ¼ kon ikaupat ka bahin sa makolekta nga multa gikan sa ilang mga dinakpan.

Kini aron sa pagdasig sa mga sakop sa CESET nga maninguha pagpanakop sa mga malapason sa balaod, sama niadtong mga tawo nga magpataka og labay'g basura nga posibleng mamultahan og P1,000 ngadto sa P5,000.