Glo-Garci tape mahimong ibrodkast

Gipahibalo sa Kapisanan ng mga Brodkaster nga Pilipinas nga hangtud nga dili maprubar nga illegal ug nakuha gyud pinaagi sa wiretapping ang kontrobersyal nga tape sa giingong "pagpanikas" ni presidente Arroyo sa piniliay padayong mahimo kining ipublikar.

Si KBP Corporate Secretary Rudolph Jularbal mibutyag sa mga tigbalita hangtud dili maresolba kun "authentic" nga wiretapped ang maong tape mamahimo kining ipagawas sa mga radyo ug telebisyon.

Apan miawhag si Jularbal sa mga miyembro sa KBP nga kun ipublikar man kini sa kahanginan gikinahanglan nga pahibaw-on ang publiko nga "dili beripikado" ang maong tape.

Gihulagway sa mga abogado sa KBP nga usa ka pahibalo ug hangyo ug dili kamanduan ang gipagawas nga circular sa National Telecommunication Commission (NTC) sa pag-ban sa pagpalanog niini sa kahanginan aron pagpahinumdom sa responsableng pamahayag.

Anha nalang kini ipahunong sa KBP kun dunay moreklamong ila ang maong tingog ug kun maprobar nga gikan sa pag-wiretap ang maong tape.