Kapolisan alerto vs. mga karnaper

Mga karnaper gipanid-an sa kapolisan gumikan sa daghang insidente sa pagpangilog og pribadong sakyanan gikan sa nagkadaiyang lugar dinhi sa dakbayan sa milabayng mga bulan.

Si Cebu City Acting Police Director Melvin Gayotin mipahibalo sa mga sakop sa media nga bantayanan na kaayo karon ang kalihukan sa mga karnaper nunot sa pagdaghan sa mga insidente niini.

Usa sa mga dapit nga buot nga pahugtan ni Gayotin ang seguridad mao ang mga parking lot sa mga dagkong department stores diin sagad nga adtuan sa mga tawong dunay kaugalingong sakyanan.

Namatikdan nga kasagaran sa mabiktima niini mao kadtong mga sakyanang dunay mga yagpison og panglawas nga mga drayber sanglit gituuhang dali lang kining pahilumon ug mahulga sa mga karnaper.

Dako ang pagtuo sa kapolisan nga adto mapunta sa mga "chop-chop" shop ang mga makawat nga sakyanan sanglit malisod man kining mabaligya kung tibuok apan kung pisa-pisahon kini pagbaligya walay makahalata sa binuang.

Dugang pa niini gituuhang ang mga responsible wala magbase dinhi sa Sugbo ug moanhi lang kun dunay himuong operasyon.