Patay diha dayon ang drayber sa habal-habal nga si Isagani Zapanta Ricablanca, molupyo sa Barangay Gun-ob dakbayan sa Lapu-Lapu kinsa mimaneho sa Honda TMX-155 nga may plakang GN-3194 ug gipanag-iya ni Victor Rabasa nga taga dakbayan sa Lapu-Lapu.
Samtang patay usab nga midangat sa Vicente Sotto Memorial Medical Center ang backrider ni Ricablanca nga si Joel Llamoren, hingkod ang panuigon ug molupyo sa Barangay Mabuli sa naasoyng lungsod.
Si SPO1 Cresente Armamento sa Operations Branch sa Cebu Provincial Police Office mitug-an sa Banat News nga kasamtangang nagbiyahe ang Isuzu truck van nga may plakang GCL-515 ug gimaneho ni Isabelo Canoy, taga Dumanjug padulong unta sa dakbayan sa Sugbo dihang nahitabo ang aksidente.
Giingong ang motorsiklo sa mga biktima kalit nga mi-overtake sa laing trak nga gisundan niini apan adto kini hinuon masangit sa trak ni Canoy nga gikasugat.
Tungod sa kakusog sa panagbangga nangalagpot ang mga biktima ug maoy nakaingon sa hinanaling kamatayon ni Ricablanca samtang grabeng naangol si Llamoren apan gideklarar kining "dead on arrival" sa mga mananambal sa VSMMC.
Giingong nakaangkon og daghang bali-bali sa kabukugan ang mga biktima tungod sa paghandos sa trak diha sa ilang motorsiklo diin ang ilang mga lawas nag-ungot.
Gikatakdang pasakaan karong adlawa og kaso ang suspek nga si Canoy kinsa mitahan sa iyang kaugalingon human sa insidente.