Simbahan nanawagan og pag-ampo

Ang hiniusang pag-ampo sa katawhan maoy labing gikinahanglan alang sa pagsakbang sa mga politikanhong krisis nga nasinati sa nasud nga gikabalak-ang makahaling sa kagubot.

Mao kini ang gipahimug-atan nga panawagan sa simbahan taliwala niining walay hunong nga pagtay-og sa administrasyon ni Pangulong Gloria Macapagal- Arroyo nga gipintalan sa mga pasangil ug mga kontrobisyal nga mga isyu.

Si Monsiyor Achilles Dacay nga maoy media liaison officer sa Artsidyosesis dinhi sa Sugbo maoy mipadayag niini ug kini namantala sa Bag-ong Lungsoranon nga maoy opisyal nga mantalaan sa Artsidyosesis sa Sugbo.

Dugang pa ni Monsinyor Dacay nga angay gayod hinumdoman sa katawhan nga ang pag-ampo alang sa nasud ug sa mga nangulo sa pagpadagan sa goberno mao karon ang labing ginikanahanglan.

Gitataw ni Monsinyor Dacay nga ang hiniusang pag-ampo sa Ginoo mao gayod ang unang kadangpan sa katawhan sa higayon nga makasinati kini og kalisod. "Prayer should be our first and not our last resort!" nagkanayon si Monsinyor Dacay.

Nunot niini si Dacay mipasabot nga makadaghan na mahitabo nga mag-atubang ang nasud og ang katawhan sa kasamok og ang artsidyosesis og oratio Imperata o pag-ampo nga gisugo nga pangadyeon sa tanang simbahan alang sa nasud ug sa mga nangulo niini. Matud pa ni Dacay nga gibalik kini ni Cardinal Ricardo J. Vidal ang maong kamandoan sanglit buot lamang niini ipahinumdom sa katawhan ang mga panghitabo nga anaa ang hulga sa kagubot ug pagbuak-buak nga ang hiniusang pag-ampo mao lamang ang bugtong kadangpan.