MATUD NI DURANO PNP padanihon turista

Bohol - Gibutyag ni Secretary Joseph Ace Durano sa Department of Tourism nga mihimo siya og awhag sa kadagkuan sa Philippine National Police nga muhimo og lakang aron sa ingon matagad gayud ang problema nga ipaabot sa ilang buhatan ilabi na gayud kon kini gikan sa mga turista.

Si Secretary Durano miingon nga dako gayud kaayo og gimbuhaton ang PNP pagtabang sa nasudnong kagamhanan sa tinguha niini nga makadani og mga turista gikan sa laing nasod.

Usa sa hagit ngadto sa PNP mao ang pagtagad sa problema nga ipaabot sa mga turista nga muduaw sa matag lugar.

Giangkon ni Durano nga kon dili matagad ang problema nga ipaabot sa usa ka turista adunay dako nga posibilidad nga dili na kini mubalik sa nasod.

Laing problema nga nakita ni Durano nga kini mao ang musulti sa iyang mga kahigalaan sa lugar nga iyang gigikanan sa dili pagduaw sa nasod.

Midugang si Durano nga angayan nga adunay mga polis nga mahibawo sa sinultian sa nagkalain-laing mga turista nga muduaw sa usa ka lugar.

Kini nga gimbuhaton angayan gayud kaayo sa usa ka polis nga maoy tahasan sa pagpahigayon og imbestigasyon.