Seminarista nga peke, mangingilad

Nagpailang seminarista nadiskubrehang kawatan diay ug nasutang modus niini ang pagpangilad sa mga parokya ug mga relihiyosong pundok sa simbahang Katoliko.

Ang community elder nga si Sr. Josephine Librando sa Sisters of the Divine Mercy Society (SDMS) diha sa Balhaan, Madridejos, Alegria mipahimangno sa Archdiocese of Cebu kalabot sa pagpangilad sa nagpailang Reverend Paul Sevilla.

Si Sevilla gikatahong miabot sa komunidad sa Alegria ug nagpailang sakop sa Disciples of Hope (DOH) nga nagbase sa Diocese of Maasin adtong Mayo 8, 2005.

Nangangkon kining ordinahanan adtong milabay'ng Hunyo 5 sa usa ka seremonyas nga himuon diha sa ilang lugar sa Maasin ug pinaagi sa pagmaniobra ug diskarte gikatahong nangilad kini sa mga molupyo pinaagi sa pag-solicit o pagpangayo og kwarta.

Aron katuohan ang iyang buhat gikatahong mokuha kini og mga retrato sa kasamtangang proyekto sa mga simbahan. Namatikdan si Sevilla nga mikuha og mga hulagway sa shrine nga gihimo sa Alegria.

Nianang pagkagabii usa sa mga "tubigan" nga pamilya sa Alegria ang mipadayon kang Sevilla ug didto kini gipakatulog sa lawak sa anak nga lalaki sa maong banay nga usa ka tinuod nga seminarista.

Adtong Mayo 9 sa buntag wala na diha si "Reverend Sevilla" sa lawak niini, nadiskubrehan usab nga wala na diha ang cellphone ug ubang mga mahalong kabtangan sa maong banay.

Dihang gisubay didto sa Diocese of Maasin nasutang peke diay si Sevilla ug wala kini masakop sa ilang pundok ug ingon man way ordinasyon nga gitakda anang Hunyo 5.

Gikatahong una pa ang pagpangutana sa SDMS didto sa Maasin duna nay nadawat nga tulo ka susamang pagpangutana ang Diocese of Maasin gikan sa ubang mga relihiyosong pundok kalabot sa pagkatawo ni Sevilla.

Nagtuo karon ang SDMS nga usa ka mangingilad si Sevilla ug migamit kini sa mga lehitimong pangalan sa relihiyosong pundok aron makapangilad.