Ang nahisgutang pito ka suspetsado nasikop kagahapon sa kaadlawon sa grupo sa Provincial Intelligence Investigation Bureau (PIIB) pinangulohan ni PIIB chief Lemuel Obon didto sa nahisgutang barangay sa dakbayan sa Toledo.
Ang mga suspek giila sa kapolisan nga sila si Claire Aviles 28, magtiayong Mario ug Cleofe Palao, Rajs Mulchandania, Miguelito Aviles, Mark Aviles hingkod ang panuigon ug Wilson Mahilom, 38, pulos residente sa nahisgutang lugar.
Nasakmit sa mga polis gikan sa mga suspetsado ang walo ka dagkong paketeng shabu, usa ka medium nga pakete, 15 ka gagmay'ng pakete, lima ka basiyo sa pakete sa nahisgutang drugas, paraphernalia, Nokia cellphone nga gituhoan nga gigamit sa pagtawag sa pagpahigayon ug ilegal nga kalihokan ug P12,360 nga salapi nga gituhoan usab nga halin sa ginadiling drugas.
Dala sa nahisgutang mga polis atol sa ilang pagpangronda ang lima ka search warrant nga giluwatan ni RTC Judge Cesar Estrera sa Branch 29 sa dakbayan sa Toledo.
Ang maong mga suspetsado temporaryo karon nga gidetiner sa Talisay detention cell tungod kay iandam kini sila para sa press-conference karong Lunes ngadto sa buhatan sa Cebu Police Provincial Office (CPPO).
Sa laing bahin usab nasikop niadtong Lunes sa gabii sa mga polis sa lungsod sa Carcar ang usa ka anak sa konsehal sa dakbayan sa Talisay kinsa gikatahong namaligya og shabu.
Ang suspetsado mao si Paul Go, 30, nagpuyo sa maong lugar ug anak ni konsehal Emeliano Go.
Nasakmit sa mga polis gikan ni Go ang 17 ka gagmay'ng paketeng shabu, walo ka linikit nga marijuana, drug paraphernalia, usa ka barrel sa super .38 nga pusil, pito ka buhing bala sa nahisgutang kalibre ug 52 ka kabhang sa mao usab nga kalibre sa bala.
Ang suspetsado nakuhaan usab og P2,400 nga salapi apil na niini ang P200 nga mark money nga gigamit sa mga polis sa pagmatuod nga namaligya ang naulahi sa ginadiling drugas.
Dala sa mga polis nga nagronda ang search warrant nga giluwatan ni RTC-7 Judge Simeon Dumdum sa Branch 7 niining dakbayan.