Kubrador sa Abra huli sa aktong nagpapataya

MANILA, Philippines – Huli sa aktong nangungolekta ng taya ang isang kubrador ng jueteng sa San Quintin, Abra nitong Miyekules.

Tiklo sa pinagsamang puwersa ng Criminal Investigation and Detection Group, Abra provincial police intelligence at lokal na pulisya ang 43-anyos na si Pedro Castro ng Barangay Suso, Sta. Maria, Ilocos Sur.

Nadakip si Castro habang nangungolekta ng taya sa Barangay Villa Mercedes, San Quintin.

Nakumpiska sa suspek ang anim na papelitos, isang ballpen, bag at mga tayang aabot sa P377.

Inihahanda na ng mga awtoridad ang isasampang kaso laban kay Castro sa korte sa Abra.

Kamakailan lamang ay may nadakip din ang mga pulis na kubrador sa bayan ng Pidigan, Abra.