Motorsiklo humampas sa kotse; 2 sundalo patay

MANILA, Philippines – Utas ang dalawang sundalo matapos sumalpok ang sinasakyang motorsiklo sa kasalubong na kotse sa Tupi, South Cotabato nitong Huwebes, ayon sa pulisya.

Kabilang sa 27th Infantry Battalion ang mga nasawing sina Akip Totoh at Alsibar Salip Sapri.

Sinabi ni Senior Inspector Verlen Pampolina, deputy chief ng Tupi municipal police, mula sa gasolinahan ang dalawa at pabalik na sa kanilang kampo nang mangyari ang aksidente.

Sinubukang mag-overtake ng mga sundalo ngunit bumangga ito sa kasalubong na kotse sa bayan ng Tupi, dagdag ni Pampolina.

Kaagad naman sumuko ang may-ari ng Toyoto Vios, na may plakang ZNE 132, na si Joseph Cruz na patungo naman sanang lungsod ng Koronadal, ang kabisera ng South Cotabato.