Bayan sa NCotabato pinasabugan

MANILA, Philippines – Nagdulot ng tensyon sa Midsayap, North Cotabato ang pagpapasabog nitong Linggo ng gabi malapit sa mosque na pinalilibutan ng mga bahay ng magsasaka.

Nitong nakaraang linggo lamang ay pinasabugan din ang isang bahagi ng ginagawang tulay gamit ang B-40 anti-tank rocket.

Sinabi ni Senior Inspector Henry Narciso, hepe ng Midsayap municipal police, inaalam pa ng mga imbestigador kung sino ang nasa likod ng pag-atake.

Ayon sa mga opisyal ng baranggay, maaaring gumamit ang mga armadong kalalakihan ng M-79 launcher o ng M203 rifle at maaaring ang mosque ang gustong pasabugin ngunit kinapos lamang ito.

Hinala naman ng mga residente na kaya nanggulo ang mga armadong kalalakihan ay upang maningikil ng “protection money”.