Magsasaka sa Sultan Kudarat utas sa granada

MANILA, Philippines – Patay ang isang magsasaka nang masabugan ng granada sa kanyang bahay nitong Martes ng hapon sa Columbio, Sultan Kudarat.

Kinilala ang biktima na si Tuasi Dilangalen, 60. Namatay siya matapos ihagis ng isang suspek ang isang granada sa kanyang bahay.

Ayon sa mga pulis, away sa lupa ang malamang na dahilan sa pagpaslang kay Dilangalen.

Ayon kay Chief Inspector Celestino Daniel, hepe ng pulisya ng Columbio, natutulog ang biktima  nang ihagis ang granada mula sa bintana ng kanyang bahay.

Napag-alaman na may alitan dahil sa lupa si Dilangalen at isang Monsod Mangalen.

Sinabi naman ng mga lider ng Bilaan tribe na bago ang insidente ay naayos na ang gusot at napagkasunduang lilipat ng lugar si Dilangalen na lumipat sa ibang lugar, ngunit tumanggi ito.

Ipinatawag na si Mangalen ng mga imbestigador upang kwestyunin dahil sa pagdududang may kinalaman siya sa insidente. John Unson