Lending firm gitulis, Coop gilungkab

CEBU, Philippines – Kapin sa P100,000 ang nakawat sa upat ka armado’ng tulisan sa usa ka lending firm sa Poblacion I, dakbayan sa Carcar pasado alas 6 sa nakalabay nga hapon.

Wala’y nahimo ang walo ka trabahante sa Casablanca Lending Investor Corporation human sila gipangtionan og armas sa mga tulisan.

Ang mga trabahante naila nga sila si Alma Olivar, 46; Ronnie Dadang, 22; Jojo Panucat, 26; Leslie Canane, 22; Junhrie Vargas, 26; Joseph Dait, 27; Charlin Diacamus, 21 ug Gino Bandalan, 35, pulos nagpuyo sa maong dakbayan.

Matud ni Cristopher Enad, non-uniformed personnel sa Carcar Police Station, nga kalit lang nibutho ang upat ka lalaki.

Gilimas sa mga kawatan ang salapi’ng cash kantidad og P133,153 lakip na ang upat ka cellphones sa mga trabahante ug sa kompanya.

Gikataho’ng wala nagtaptap sa ilang nawong ang mga tulisan nga dali sab nga nisibat.

Ang kapolisan nagduda nga mga lokal nga tulisan lang ang nihimo sa krimen ug dili pa haniti sa pagpanulis sumala pa sa asoy sa mga biktima.

Samtang gilungkab sa wala mailhi’ng tawo ang Sibonga Water Sanitation Service Cooperative ug nakuha ang kwarta nga para sweldo sa mga trabahante. Pasado na alas 7 sa nakalabay nga buntag nadiskubrehan ni Kemuel Antoque, 27, meter reader sa mao’ng kooperatiba, nga abli na ang pultahan sa buhatan sa manager.

Matud sa kapolisan sa Sibonga nga gipugos pag-abli sa kawatan ang pultahan gamit ang usa ka sanggot nga nakuha sa crime scene.

Matud ni SPO2 Antonio Sanchez, desk officer sa Sibonga Police Station, nga wala’y close circuit television (CCTV) camera ang maong establesamento. BANAT NEWS