Igsoon sa konsehal sikop sa buy-bust

CEBU, Philippines - Nasikop sa City Intelligence Branch (CIB) ug City Anti-Illegal Drugs Operation Task Group (CAIDSOTG) sa usa ka buy- bust operation ang giilang level 2 drug pusher nga dunay igsoong konsehal sa barangay sa sitio Baho, Calamba, Dakbayan sa Sugbo.

Ang nadakpan mao si Nilo Ygoña, 52, ulitawo, ug nagpuyo ra sa maong lugar.

Si Supt. Romeo Santander, hepe sa CIB, nga nahinabi sa Banat News mitug-an nga tulo lang ka adlaw ang gihimo nilang pagmonitor sa suspetsado human ilang nadawat ang taho sa dayag nga pagpamaligya sa drugas sa maong lugar.

“Wala pud seguro na siya nagsalig sa iyang igsoon nga konsehal, dili lang gyud mahadlok mobaligya og drugas, wala mi naglisud pagdakop niya,” matud ni Santander.

Apan sa nakuhang impormasyon sa hepe sa CIB, giingong si Ygoña usa lang sa mga sinaligan sa usa ka drug lord nga naglihok sa Sugbo.

Atol sa buy-bust operation nakuha gikan sa posisyon ni Ygoña ang upat ka dagkung putos sa ilegal nga drugas nga gibana-banang balor og P150,000, timbangan, usa ka plastic pencil box, usa ka gamay nga pakete sa shabu ug P2,000.00 nga gidudahang kinitaan sa dinakpan.

Ang dinakpan gitanggong na sa Cebu City Police Office detention cell ug gikatakdang pasakaan sa tukmang kaso. (/GMR)(BANAT NEWS)