100 mil ka debotos mi-apil sa Walk with Jesus procession

CEBU CITY, Philippines - Gibanabanang moabot sa 100 mil ka mga tawo ang mitambong sa gipahigayong “Walk with Jesus” penitential procession kagahapon sa kaadlawon nga timaan sa pagbukas sa nobernaryo sa Pista Senyor.

Ang maong kalihukan gisugdan sa Fuente Osmeña Circle patubang ngadto na sa Basilica Minore del Sto.Niño.

Ang Santos nga Misa gipanguluhan ni Fr. Jonas Mejares, OSA, mipadayag kini atol sa iyang wali ang kamahinungdanon sa panaghiusa ug pagwala sa bati nga kinaiya sa tanan.

Matud pa ni Fr. Mejares nga ang “pit” sa Pit Senyor adunay kahulogan nga P- sa Paghugpong sa katawhan sa pagsalig ug pagtuo ngadto kang Sr. Sto. Niño.

Ang I-nagkahulogan nga Ipahiluna sa katawhan sa tagsa-tagsa ka kasing-kasing si Sr. Sto. Niño.

Katapusan mao ang letrang T-nagkahulugan og Tangtangon na ang laksto niining batasan kay mismo ang Labaw’ng Makagagahom wala gyud maka-uyon niini.

Human sa maong wali, gisunod usab gilayon ang pag-instalar sa Hermana ug Hermano Mayores nga silang Maximiano ug Corazon Fulcahe.

Samtang ang officer-in charge sa kapolisan sa dakbayan sa Sugbo, Sr. Supt. Mariano Natu-el Jr., dihang nahinabi sa Banat News nga wala silay nadawat nga alarma gikan sa pagsugod hangtud natapos ang prosisyon ug misa.

Gibana-bana usab ni Natuel nga mokabat sa 100 mil ka mga debotos nga miapil sa prosisyon ug bisan sa pag-ulan wala kini makabalda sa mga tawo sa pagtiwas sa ilang naandang.