Benhur mosuporta sa Capitol pagduma sa CNBT

CEBU, Philippines - Dakong  uyon  si Cebu 4th District Cong. Benhur Salimbangon   nga  mosuporta  sa Kapitolyo  sa lakang  sa pagdumala  sa Cebu North  Bus  Terminal (CNBT).

Kini  human  isugyot   ni 4th district Board member Sun Shimura kalabot sa tinguha niini nga    ang  kagamhanan  sa  lalawigan sa Sugbo mao  na  ang mopadagan  sa CNBT.

Sa pakighinabi  sa mga sakop  sa Cebu media  gibutyag  ni  Salimbangon nga nakadayeg  siya sa maong tinguha  ilabi  nga  ang  silbihan  sa maong  terminal  mao  ang  mga  sakyanan ug  mga pasahero  nga taga  norte o amihanang  bahin  sa lalawigan  nga  iya  usab  nga balwarte.

Matud niya nga ang buot  lang   ni Shimura  nga mouswag  ang  kalidad  sa serbisyo  sa maong  terminal busa  andam  siya  sa pagpaluyo  niini,  matud pa  ni  Salimbangon.

Miingon  siya  nga gusto  usab  siyang  makatagamtam  og  maayong  serbisyo  ang  mga  pasahero  nga taga norte  kun  ang  maong terminal  mahimo nang  hamugaway  ug  hinlo.

Apan  labaw  sa tanan  ang  kasigurohan  sa kinabuhi ug kabtangan  sa  mga pasahero  sulod  sa maong  terminal  nga  maoy  gikinahanglan  kaayo,  suma pa sa kongresista  sa ika-4  nga distrito sa lalawigan.

Nasayran nga naikag  kaayo  si Shimura  nga Kapitolyo  na  maoy  modumala  sa CNBT aron mahisama  ang  kamauswagon niini  sa Cebu South Bus Terminal  nga gidumala  sa kagamhanan  sa lalawigan.

Bisan  gikolektahan  niini  og  mahal  ang  mga  bus ug  ubang  pasaheroan  nga sakyanan  nga  moparking  ug  mopunit  og  mga pasahero sa maong  terminal, apan nakontento  usab  sila  sa  kahinlo, kamalinawon  ug  kasiguro  sa  kinabuhi  ug  mga butang  sa  mga  pasahero  sa maong  terminal. (/WC) (BANAT NEWS)