Unit ll sa Carbon market sugdan pagpanday

CEBU, Philippines - Sugdan  na sa pagpanday  ang edipisyo sa Unit ll sa Carbon Market karong adlawa. Kini human ipahigayon  sa ground breaking  o pagbuak sa yuta sa dapit nga tarokan sa maong proyekto sa miaging  Sabado.

Gipadayag ni  Raquel  Arce, hepe sa City Market Authority nga  katunga  pa lang  sa katibuk-ang budget ang  naandam  karon nga  kuwarta. Apan matud  pa  niya  nga  padayon pa nga nangapkap  ang  kagamhanan  og  kuwarta   aron  nga  makompleto ang  budget ug matiwas  gayud  sa pagtrabaho ang maong proyekto.

Matud pa ni Arce  nga sa  pagkakaron P170 milyones ra  ang  gigahin  sa konseho  alang  sa maong proyekto  gikan  sa gisugyot nga P350 milyones  nga budget.

Hinuon  matud  pa  ni  Arce  nga tungod  kay  kuwangon  man kining kuwartaha, maningkamot  ang kagamhanan sa pagpangapkap  og ikadugang  niini aron makab-ot ang  tukmang kantidad nga  angayang  gastoon  alang  niini. Sumala ni Arce nga ang P170 milyones nga budget makapatukod na og duha ka andana nga edipisyo sa merkado ug unya na lang  tiwasa  kun aduna  nay dugang  kuwarta.

Ang rooftop sa maong  merkado himoong parking area, unya daghan pang idugang  mga bahin sa edipisyo nga dili na  matrabaho ubos niining  kasamtangang  kantidad  nga  P170 milyones, sumala  ni  Arce. Ang Unit ll  sa Carbon  market  nasunog kaniadtong 1998  apan gumikan sa kaapiki og  kuwarta  sa kagamhanan milanat una og 14 ka tuig  hangtud karon una kini tukori pag-usab og edipisyo.

Ang kagatosan ka mga vendor nga apektado niining  pagtrabaho sa maong market  building temporaryo nga ipahimutang  sa ML Quezon Avenue. (Sanden J. Anadia/WC) (BANAT NEWS)