2 ka polis pulos lasbag gidakop gipriso

CEBU, Philippines - Duha ka hubog nga sakop sa Maritime Police nga gireklamo sa mga molupyo sa Decca Home Subdivision sa barangay Basak, dakbayan sa Lapulapu  gidakop sa mga polis  ug gibalhog sa prisohan  sa miaging gabii.

Ang duha nga mikagulkol  sa bilanggoan  mao sila si PO2 Edwin Tumangan ug PO3 Dominador Polistico pulos hingkod, ug nadestino sa PNP Maritime sa dakbayan sa Mandaue.

Si PO1 Ryan Bintoy sa kapolisan sa Presinto 4 nga nahinabi sa Banat News miingon nga mireklamo ang mga molupyo sa  Decca Homes kay matud pa gawas nga lasbag kaayo  ang  duha  nagpabuto  pa gyud  sa ilang  mga  armas de fuego.

Dugang pa niya nga ang  mga sakop sa mobile patrol nga sila si PO3 Richard Alforque ug PO1 Alexander Baquerquer maoy  mitubag  dayon sa maong alarma.

Matud pa ni PO1 Bintoy nga sa ilang  pag-abot sa maong lugar  nagpaila  dayon  sila nga polis apan wala gayud  mopatuo  ang duha, nagpadayon gihapon sa ilang pagsaba-saba.

Gumikan sa kapungot nila ni PO3 Alforque  ilang gisikop  ang  duha  ug  gidala ngadto sa  Lapulapu City Hospital diin nasuta  nga  positibo  sa liquor test.

Ang duha gitakdang pasakaan og kaso sa kalapasan nga ilang nahimo nga naglakip  sa pag-inom og ilimnong makahubog ug ang pagdisturbo sa publiko. (Romeo T.  Limpangog/WC) (BANAT NEWS)