Laing reklamo batok sa kidnapper sa Koreano

CEBU, Philippines - Laing reklamo nadawat sa buhatan sa City Intelligence Branch (CIB) kalabot sa suspetsado nga iyang gipangita  kinsa  nalambigit  usab sa pagkidnap sa usa ka Korean national ug sa kapuyo niining  Filipina  niadtong Miyerkules.

Si Paul Pilapil, 40, lumad nga   taga Catarman, lungsod sa Liloan,  misumbong  sa buhatan  sa CIB  kalabot sa giingon  niyang pagpangilad nga gihimo ni Gregorio Dealagdon kaniya

Si Pilapil  miduol sa CIB  human  niya mabasahe  dinhi  sa Banat News ang  balita  bahin sa pagkasikop ni  Dealagdon nga  dugay  na  niyang  gipangita.

Matud  pa  ni Pilapil nga niadtong buwan sa Nobiyembre sa miaging tuig ang iyang higala nga si Dealagdon maoy mipasalig nga kini maoy mo-finance sa paglukat sa mga  papeles sa ilang  yuta sa Barangay  Catarman aron  kini  ikabaligya.

Apan ubos  sa kondisyon  nga  siya (Dealagdon)  maoy  magsilbing  ahente  niini  ug  mangita  og buyer  aron  mahalin.

Apan  natingala si Pilapil kay human sila magkasabot  sa maong  transaksyon wala na niya igkita si Dealagdon hangtod nga kagahapon sa buntag iyang nabasahan   dinhi  sa Banat News  nga nasikop ang suspetsado.

Samtang ang personal  nga drayber sa Koreano ug sa uyab  niini mibutyag usab nga pipila ka adlaw sa wala pa masikop ang suspetsado iya kining nakita dapit sa apartment sa biktima.

Si Charice   Santiago, hingkod,  dalaga,  nga maoy kapuyo ni Jun Hyung Chung    mibutyag usab nga dakong bakak ang gibutyag sa mga suspetsado tungod kay si Song Sung Heum kinsa  maoy utok  sa maong pagpangidnap maoy utangan og kapin sa P4 milyones  kanila.

Sayo niini  giingong  gisugo ni Song Sung Heum sila si Dealagdon  nga  ipakidnap  si Jun Hyung Chung tungod kay nakautang  kuno kaniya og kapin  sa P4 milyones. (Lesley Caminade-Vestil/WC) (BANAT NEWS)