Babaye napagan patay

CEBU, Philippines - Namatay ang usa ka babaye human  kini masabak sa saag  nga bala gikan sa armas sa usa ka kriminal nga namusil sa lalaki  nga iyang gigukod didto sa sitio Marna, barangay Subangdaku sa dakbayan sa Mandaue  sa miaging kaadlawon.

Ang namatay mao si Jessel Magalzo, 28, minyo nga nagpuyo sa maong dapit, samtang ang   anaa sa talandugon  nga  kahimtang  mao si Mark Arasia, 32, minyo, nga taga barangay Mabolo sa dakbayan sa Sugbo.

Matud pa ni PO2 Roldan Balimbing sa Investigation Detection Group and Management Bureau  (IDMB) sa Mandaue City Police Office (MCPO) nga nahinabi sa Banat News nga si Magalzo sayo nga migawas sa ilang  balay kay naghuwat sa iyang  bana gikan pa sa trabaho.

Samtang naglingkod-lingkod kini sa daplin sa karsada kalit lang nahiagi si Arasia nga nagdagan ug nagpaninggit nga nangayo og  tabang samtang gigukod kini sa wala hiilhing  lalaki  ug mipusil  kaniya.

Apan  matud pa ni PO2 Balimbing   nga sa mga bala nga alang unta kang  Arasia  may  usa  nga mitipas ug  didto  moigo sa dughan ni  Magalzo kinsa wala makadagan sa maong  higayon  gumikan sa kakalit  sa hitabo.

Dugang pa ni PO2 Balimbing nga si Magalzo dali nga gidala ngadto sa Cebu City Medical Center sa dakbayan sa Sugbo apan ang mga doktor nga nag-atiman kaniya mideklarar nga patay na siya  sa paghiabot  sa maong  tambalanan

Samtang si Arasia nga gidala sa Vicente Sotto Memorial Medical Center sa dakbayan sa Sugbo   kritikal nga kahimtang kasamtangan pa nga gioperahan  sa pagtangtang sa ubang  mga bala nga  miungot  sa iyang  lawas.

Si PO2 Balimbing miingon nga dili pa nila matataw ang hinungdan sa maong pagpamusil sanglit bugtong makasugilon sa maong hitabo mao lang si Arasia kinsa  dili pa makasulti  niining higayona.

Gitataw hinuon ni PO2 Balimbing nga adunay pipila ka mga tawo nga nakakita dihang nahitabo ang pagpamusil ug maoy miila sa mamumuno apan gipugngan una nila karon ang ngalan niini sanglit nagpadayon pa ang ilang follow-up operation nga gihimo. (/WC) (BANAT NEWS)